Friday, 27 June 2008

سلق بيض ...ورياضتنا المتخلفة



في كل سنة من سنوات مجلسنا العتيد

كنت أمني النفس بأن أرى مناقشة تفصيلية

لميزانية الدولة و منها ميزانية الهيئات والمؤسسات

لـــــكن أول مرة أشوف ميزانية دولة تقر بربع ساعة

ومع العلم هذي الميزانية تعتبر الأكبر بتاريخ الكويت
بس شبتقول الموضوع كله عبارة عن سلق بيض

في الدول المتحضرة الواحد يستانس لما يشوف

الشخصيات تتنافس كمنافسة شريفة للوصول الى الهدف
الأهم عندهم وهو وصول بلدهم الى مكانة عالية وتحقيق أعلى النتايج

الا عندنا
الشخصيات اللي عندنا يحبون الهواش بالجرايد
ومايهم شنو حققت ولا شنو سويت
المهم فلان مايصعد وآنا أووووقف

ومن قرأ تصريح مرزوق الغانم قبل جم يوم



والرد العجيب والغريب من الشيخ طلال



يقول أن رياضتنا بأحسن حال والنتايج عال العال

والله حرام عليهم
هدوا كل شي وهدموا الرياضة بكبرها
وركزوا على كآس التفوق

ياخرطي يامالوا خربتوا رياضتنا بخلافكم
وصرنا بالحضيض وآخر شي
بدال لاتتكلمون على خروجنا من تصفيات كآس العالم
قاعدين تتهاوشون على منو بياخذ كأس التفوق
آخ بس آخ
قالوها كل بقلبه شقا اللي له


موضوع اسماعيل الشطي سبق أن طرحته







اليوم بجريدة الرؤية تؤكد صحة اللي كتبناه و ما أقول الا الله يستر بس

Monday, 23 June 2008

وطني الكويت سلمت للفوضــى




أيام ماكنت اتابع قناة سكوب في الانتخابات الأخير
حفظت اعلان لأحد المرشحين
طبعا من كثر مايحطونه ويرددونه
ليما قمت أقوله لعيالي
الأخ المرشح يقول في اعلانه
في ناس شعارهم وطني الكـــويت سلمت للنهب
شي يظيق الخلق لما يكون عندنا ناس تفكيرهم ينصب على هالشي
عادي تعودنا وبالكويت وخاصة هالسنتين
طلعت عندنا بلاوي وتراكمات صار لها سنين
بعض اللي ساكنين بالمناطق البعيدة
عندهم نظرة أن الي داخل ومن عوايل كبيرة حرامية

وبعض اللي ساكنين بالمناطق الداخلية
عندهم نظرة أن اللي ساكنين بعد الدائري الخامس
متخلفين ومايفهمون شي
وبالطبع هذا ينعكس على الأعضاء
وشوفوا طلباتهم وأحكموا
أقصى طموحات بعض أعضاء المناطق الخارجية
الخمسين ، الديوانيات ، اسقاط القروض
وأعضاء الداخل على قولتهم ضايعين وماهم عارفين شالطبخة
الحكومة هني تعاني الأمرين
ومجبرة على أن تساير الوضع وتخلص دور الانعقاد على خير
هذا اذ كــــان عندنا حكــــــومة
بالأمس يطلع لنا الشمالي ويقول الخمسين مرفوضة


واليوم يقول سنبشر أهل الكـــويت بزيادة حــــلوة

شـــالفوضى هذي وشنو هالمسخرة
اذا كنت ماتملك القرار يا أخي لاتصرح ولاتعذبنا معاك
وثاني شي شنو سالفة الزيادة للأصحاب المعاشات الأقل من الف دينار
شنو نسيتوا ان عندكم درجات وظيفية

مالــنا الا شعار صاحبنا المرشح بس مع التغيير شوي
وطني الكويت سلمت للفوضى
قبل لا أنهي مستر بو نبول
الظاهر أنه مايستحي وقاعد يتشمت بمرض السعدون
ماني قايل الله يجازيه ويصير فيه نفس الشي
لكـــــــن بقــوله ماعلموك في مدرستك
مدرسة الخرافي الأخلاقية
انك ماتضحك على المريض
ولا هذا خـــــارج المنهج يا عمري

Saturday, 21 June 2008

رمحٌ... لا ينكسر




من قال انك طحت


لا حشا والله ماطحت


الناس كل قلوبها طاحت


شلون ماتطيح


وانت رمز هالقلوب وراعيها


خطاك السو يا الغالي


انت وكل الكويتيين انشالله


ودي تشوفون فيديو الأسد


Wednesday, 18 June 2008

عجايب العالم سبع ...واحنا كل يوم عجبة

بمجلس الأمة سمعت عن اقتراح برغبة
لكن أول مرة أسمع انشاء دوارين بناء على رغبة
اذا الموضوع مايتعلق بتنمية ولا بخطة
يرحم والديك بشارعنا مافي لفة فوق تحت
ممكن بناء على رغبة تسوي لنا هاللفة
تتذكرون قصة العلم بشهر فبراير


الحين صار بس مع حليمة

أبيـــــــــــــــــــــكم تـنـتـقـدون


شسالفة وزير التجارة ؟ كل يوم قصة

انزين يصير يحطون في البنك الدولي..العقاري سابقا



هذي الكويت موقالوا عنها البقرة الحلوب


عرفتوا ليش زايرنا الحبيب



Monday, 16 June 2008

حكومتنا صارت سلفية



مالي شغل بالسلف ولا في موضوعهم لان تعودنا على سالفتهم كل سنة


وتعودنا بعد على تصريحات المسؤولين والوزراء والنواب بعد


مع أن الموضوع فني بحت ويعتمد على أدلة


بس يحبون الترزز و مع الخيل يا شقرا


يعني من اللي يملك البراءة عليه أن يقدمها للخزانة الامريكية


وأهما عاد وقانونهم


بس اللي شدني تحركات وزير التجارة هاليومين


عسى ماشر بومحمد ؟ انت الحين وزير وتمثل حكومة


شمدخلك بهالدوخة وانت تمثل جهة حكومية وتعتبر من أعلى السلطات


مافي داعي زياراتك لرئيس الحكومة ولولي العهد عشان تبين وجهة نظر الجمعية


عليه من يقبل المنصب الوزاري أن يبعد نفسه عن جميع الجهات المنتمي لها


الا احنا بالكويت لامحترمين حكومتنا ولا محترمين وجودها


جابل وزارتك ؟ وشوف مشاكلها أبرك من هالسوالف ؟ عدل


يعني الحين خلاص


اعتبرمشاكل الهيئة العامة للصناعة انحلت


اعتبر مشاكل السوق ولجنتها التعبانة انحلت


اعتبر قانون سوق الاوراق المالية انحل


اعتبر ظاهر تفشي الاسعار انحلت


اعتبر تطبيق التجارة الالكترونية انحلت


خليت كل هذول وامجابل جمعيتكم السلفية ومشاكلها


ما أقول الا مسكـــــــــينة يا الكويت

Wednesday, 11 June 2008

نماذج من الجمهورية الإمبراطورية الكويتية الاشتراكية






اليوم بقدم نموذجين من أروع النماذج اللي دشوا موسوعة جينيتس

وهم عبارة عن شخصين استطاعوا أن يدخلوا البسمة على مر

السنوات الماضية

أولهم

معالي الدكتــــــــــــــور





هاليومين زادت مشاكل الصحة عن كل مرة ليش عسى ماشر ؟

جرت العادة بالسنوات الأخيرة يا نشوف هواش النواب مع الوكيل

يا نشوف هواش الناس بادارة العلاج بالخارج

هذا غير اعتصام الأطباء ولأول مرة حول كادرهم

لكــــــــــــن

هاليومين طلعت لنا شغلات جديدة

حشرات المتروسة بغرف العمليات

استقالة أطباء وجراحين كويتيين مطلوبين عالميا

حرائق في كل مكان ، بالاضافة لتعطل التكييف في المستشقيات

هذا غير توقف المشاريع في الوزارة

ياترى من المسؤول عن اللي قاعد يصير بالصحة ؟؟؟

معقولة كل اللي مروا على الوزارة مايفهمون ؟

معقولة كل الناس اللي انتقدت ما يعرفون ؟

يمكن الدكتور على صح وإحنا على خطأ

وزراء راحوا ومعالي الوكيل موجود ؟؟؟

شنو قوته ؟ وشنو نفوذه ؟

خله يعلم رئيس الحكومة عشان يستمر

وإذا كانت صدفه ليش ماندورعلى غيره ؟؟؟

لا وأزيدكم من الشعر بيت

يوم حطوه وكيل أصلي بعد ماكان وكيل مساعد للأدوية

ما حط واحد بمكانه ؟؟؟

طيب ليش ؟ مافي واحد مؤهل

ولا المكان السابق وايد قـــــوي

أول مرة أشوف وكيل وزارة أصلي وليلحين ماترك منصبه المساعد

-----------------

الثانية

وآخ من الثانية

الدكتورة



مادري شقصة الدكاترة واللي المفروض نعتبرهم قدوة

ومثال للإدارة الجيدة والتطور

لكـــــن عندنا بالكويت كل شي فوق تحت

المهم آنا سمعت وايد عن مشاكل الطلبة بالخارج والمعاملة

السيئة اللي يشوفونها من موظفين التعليم العالي

هذا طبعا غير القرارات القراقوشية للست الوكيلة

كل يوم قرار شكل وكل يوم يطفشون واحد

المهم آنا لي قصة معاهم صارت معاي قبل يومين

أولا آنا حاصل على الإجازة الجامعية وموظف

بالقطاع الحكومي وأرغب بدراسة تخصص جامعي آخر

المهم قلت أروح لهم وأشوف شنو النتيجة

وطبعا طـــــــــول الدرب أقول الله يستر

دشيت وعقب السلام قلت لهم قصتي

وأرغب بدراسة تخصص ثاني بس خارج الكويت

وعلى حسابي الشخصي

والمطلوب من معاليكم بس

فتح الملف والموافقة على الدراسة أما موضوع الإجازة ف آنا بآخذها

من رصيد إجازاتي


يعني لا طالب ولا مطلوب

وأساسا مابي أعدل وضعي بالحكومة لأن منصبي مناسب لي ولكن أرغب

بالحصول على تلك الشهادة لمزيد من العلم والمعرفة

وآنا كنت أتكلم ... كانوا الموظفتين يطالعوني و أهم منبهرين

و ودهم أيقولون لي أنت ح...
بس أحترموني



عقب ماخلصت قالولي مانقدر أنفيدك وروح حق رئيسة القسم

شنو ؟؟؟

عقب هالكلام تقولون لي روح إحنا ماندري ؟؟؟


المهم رحت حق مسئولتهم

وطلعت أخس منهم

قالت القوانين جذي وما يصير احد يدرس مرة ثانية


شنو ؟؟؟؟ ليش ؟؟؟

ياجماعة الشرع حلل أربعة ؟ وأنتم بس مرة ؟


المهم مانقدر أنفيدك

روح هاجر أحسن

رجعت للدوام مكسور وأضرب أخماس في أخماس

ويا أمة ضحكت من جهلها الأمم


__________________


دائما ما كنت أردد أن حل أزمات الحكومة هي إحلال الشباب

بدلا من الموجودين حاليا وعمل نفضه مو طبيعية في منصب

الوكلاء الأصليين والوكلاء المساعدين

ونسف كل من تخرج بالستينات والسبعينات


و نقولهم كفيتوا و وفيتوا يا كبارنا

Friday, 6 June 2008

معركة الفساد القادمة




بعد انتخابات الرئاسة الواحد ماله خلق يكتب شي


يمكن التشاؤم من المستقبل أهوا



اللي خلانا بهالشكل


ولكن ولله الحمد يوم عن يوم


الواحد قاعد ترد صحته وابتسامته اللي فقدها


و لكن وبعد ما الجو هدى شوي شنو
اللي قاعد يطبخ الحين ؟


يدور حاليا الحديث عن رئيس
ديوان المحاسبة القادم ومن هو ؟
وماهو دور رئيس مجلس الامة في اختياره



خصوصا كرد الدين لرئيس
الحكومة الذي طلب التحويل
والتصويت للخرافي كاجماع عليه؟؟؟


ومن هو هذا الشخص المقرب لدى الرئيسين ؟؟؟

واذا عرفنا أن ديوان المحاسبة هو

بمثابة هيئة مستقلة للمراقبة المالية
ويلحق بمجلس الأمة

وتعتمد رقابته (المسبقة واللاحقة والفنية) على
رفع التقارير الخاصة والسنوية
إلى كل من السلطتين التنفيذية والتشريعية

متضمنة ما يتكشف له من المخالفات المالية

وما يجب أن يوقع من عقوبات قانونية حيالها
والواقع أن رقابة ديوان المحاسبة المالية
تأتي شاملة جامعة لكافة المصروفات العامة بالدولة
وفي هذا الشأن فقد خوله القانون الكشف
عن كل مظاهر الهدر أو الإسراف
أو الاختلاس أو الإهمال

كما أجاز له اقتراح وسائل العلاج

ويتم تعيين رئيس الديوان بمرسوم أميري

بناء على ترشيح رئيس مجلس الأمة

وإقرار المجلس لهذا الترشيح في جلسة سرية


وبعد موافقة مجلس الوزراء

و بعد مرض وكبر سن العم براك المرزوق

يرى الكثير من السياسيين ضرورة


ايجاد شخص مناسب لتولي هذه المسؤولية

والاخوة المدونين عاجل ، بوحامد

سبق أن أشاروا لهالموضوع وقدموا كشف
للأشخاص المتوقع لهم
ولكن الاسماء اللي رشحوها كان
في شهر فبراير الماضي

يعني الوقت تغير وفي ظروف أيضا تغيرت

يعني بالعربي الفصيح منو هالشخص الفلته ؟
اللي راح يجمعون عليه

يوم الجمعة سمعت معلومة عن شخص سيرشحونه
وقاعدين يطبخون له
السالفةعلى نار هادية
ومن الخرعة قمت واتصلت على أكثر
من مصـــدر للتأكد بس ؟


وجاءت الصــــــــــــــــــدمة


نعم انها الصدمة


الكل يعرف بترشيخ الحكومة للأخ



وأيضا رئيس المجلس لايجد الممانعة
في الموافقة على الدكتور
ولــــــــــــــــــــكن
وعلى الرغم من تحفــــظنا الكامل عليه
وعلى شخصيته وتاريخي السياسي
اللي منيل بستين نــيلة

يبقى هناك سؤال مهم هل سيوافق عليه المجلس

خصوصا أن الجلسة ستكون ســــــرية


يعني في شي بيندفع تحت الطاولة

وخصوصا أن احنا جربنا هالأعضاء وبجلسة



علنية في انتخابات الرئاسة




__________




موضوع قهوة جبلة أخذ أكبر من حجمه


ويدل على أن احنى شعب ماعنده شغل


خلينا البلاوي الكبيرة وركزنا على


توافه الأمـــــــــــور


وأعتقد ان الصرعاوي وصلتله


المعلومات ناقصة أو من شخص تافه


قصة القهوة ومافيها


ان مشروع الدائري الأول أقر في

سنة 2002 وبعد سنتين

حصل صاحب القهوة على الترخيص

يعني الاخوان في الاشغال والبلدية

ماعارضوه ولاشافوا أي مشكلة


اذا وين المشكلة ؟؟؟


المجلس البلدي في جلستة الأخيرة


طلب من صاحب القهوة

ازاحة 3 أمتار وعلى حسابة الشخصي


طبعا وافق وماعنده أي مشكلة


عيل ليش الضجة ؟؟


شبتسوي الصحافة بدها ضجة وعجئة


________


الملاحظة الأخيرة : أعتقد بلد العشاير ونظام

شيخ القبيلة ولى بلا رجعة

لكن مانشوفه هاليومين من مناشدات

تســــد النفس

ومع احترامنا لتدخل الأمير في علاج البنت

وتدخله أيضا السامي في انشاء صالة

اتحاد كرة اليد

فهو يدل على أن عندنا مسؤولين

ودك تعلقهم بساحة الصفاة


لازم يعني الأمير يتدخل

عشان تحلون السالفة ؟؟؟


وين دولة القانون والمؤسسات ؟؟


ولا كل هذا خرابيط في خرابيط